Հալէպահայութեան Ջահերթը

Read Time:2 Minute, 11 Second

ՀԱԼԷՊ («Գանձասար»)․- Կիրակի, Ապրիլ 21-ին, հալէպահայութիւնը միասնական շարքերով, ժողովրդային ջահերթով ոգեկոչեց Հայոց Ցեղասպանութեան 109-րդ տարելիցը եւ մէկէ աւելի սերունդներ, յատկապէս երիտասարդական միութիւններ ներկայացնող խումբերով քալեց Ազգային Քարէն Եփփէ Ճեմարանէն դէպի Ազգային Գերեզմանատուն՝ իր յարգանքը մատուցելով Հայոց Ցեղասպանութեան 1,5 միլիոն սրբադասուած նահատակներուն եւ յիշելու, պահանջելու իր ուխտը վերանորոգելով։

Ջահերթը կազմակերպած էր Սուրիոյ Երիտասարդաց Միութեան Կեդրոնական Վարչութիւնը: Անոր կը մասնակցէին Բերիոյ Հայոց Թեմի Առաջնորդ Գերշ. Տ. Մակար Սրբ. Արք. Աշգարեան, Բերիոյ Թեմի Կաթողիկէ Հայոց Առաջնորդ Արհ. Տ. Պետրոս Արք. Միրիաթեան, Սուրիոյ Հայ Աւետարանական Համայնքապետ Վերապատուելի Դոկտ. Յարութիւն Սելիմեան, Հ․Հ․ Հալէպի Հիւպատոսութեան խորհրդական Դաւիթ Թադեւոսեան, Հ․Հ․ Մարդասիրական Խումբի պատասխանատու, գնդապետ Արկատի Տօնոյեան, Սուրիոյ խորհրդարանի հայազգի երեսփոխաններ, հոգեւոր հայրեր, հալէպահայ երեք կազմակերպութիւններու, Ազգային իշխանութեան, հալէպահայ բարեսիրական, մշակութային, մարզական միութիւններու, ներկայացուցիչներ ու հարիւրաւոր հալէպահայեր։

Ջահերթը Սուրիոյ եւ Հայաստանի հանրապետութեանց զոյգ դրօշներով առաջնորդեց Հ․Մ․Ը․Մ․-ի Հալէպ Մասնաճիւղի փողերախումբը։

Յաջորդաբար ջահերով տողանցեցին Հ․Մ․Ը․Մ․-ի Հալէպ Մասնաճիւղի սկաուտական շարքերը, Սուրիոյ Երիտասարդական Միութեան, «Քրիստափոր» Ուսանողական Միութեան, Հայ Երիտասարդաց Ընկերակցութեան, Սուրիոյ Պատանեկան Միութեան ու «Համազգային»-ի, Սուրիոյ Օգնութեան Խաչի եւ Ազգային Քարէն Եփփէ Ճեմարանի Միութեան անդամները, Հալէպի մէջ Հայաստանի Հանրապետութեան Մարդասիրական առաքելութեան խումբը, այնուհետեւ ժողովուրդը՝ օրուան կարգախօսը պարզող եւ Թուրքիան դատապարտող պաստառներով ու ցուցատախտակներով:

Ազգային գերեզմանատան մուտքին փողերախումբը հնչեցուց Սուրիոյ եւ Հայաստանի զոյգ քայլերգները:

Գերեզմանատան սեմին զետեղուած էին 1915-ին նահատակուած մտաւորականներու պատկերները, սերունդներու յիշողութեան մէջ վառ պահելու հայ նահատակներուն արեան կանչը։

Գեղարուեստական կարճ յայտագիրէ մը ետք օրուան պատգամը ուղղեց Բերիոյ Հայոց Թեմի Առաջնորդը։

Այնուհետեւ ցեղասպանութիւնը խորհրդանշող յուշաքարին առջեւ զետեղուեցան ծաղկեպսակներ, ապա հայ հոգեւոր պետերը եւ կազմակերպութիւններու ներկայացուցիչները միասնաբար բոցավառեցին յուշաքարին մօտ գտնուող ցեղասպանութեան նահատակներուն յիշատակը խորհրդանշող ջահը։